يلا نعمل دماغ ناس متينه

بس المرة دى مش اي دماغ دي اسمها
( دمــــــــاغ نـــاس )
ايـــــه دماغ ناس دى ؟..


- دماغ ناس .. زى دماغ قهوه .. دماغ لب وسودانى .. تعمل دماغ " ناس"..
بص ياسيدى ..



لو فى يوم لقيت نفسك متضايق ومخنوق وملكش نفس تكلم حد ومش لاقى حاجه تعملها ..
إنزل الشارع إتمشى لواحدك و تأمل فى الناس ..
هتلاقى الموضوع مسلى جدا ..
الشعب المصرى ده لذيذ طحن ..
دماااااااااااااااااغ




* هتلاقى ناس طالع عين أهلهم فى أتوبيس فيه 186 واحد والناس طالعين من الشبابيك والجو حر ..
والناس لسه بتركب وهى مبتسمه وحاسه بالكفاح ..
وتلاقى واحده ست تخينه – غالبا موظفة – دخلت وسط الـ 120 واحد اللى واقفين على الباب واخترقت الجموع فى براعة ورشاقة تحسد عليها ..
سبحان الله




* بنت لابسه هدوم المدرسة ومزوغة ماشيه مع ولد
– ممكن تحلف إنه مش هيلاقى شغل ولا بعد 100 سنه من شكله –
وإن لقى.. أول حاجه هيعملها أنه يسيب البنت دى ..
كفايه فقر بقى ..


* واحد ومراته - كبار فى السن – ماشيين على الكورنيش بياكلوا ترمس فى منتهى السعادة والأمتنان ومش عايزين حاجه تانيه من الدنيا ..


* واحد شكله تعبان طحن ومش لاقى ياكل، بس جايب أحدث " الموبايل " وبيتكلم فيه بصوت عالى فى وسط الشارع..
عشان هو حر ..



* واحد عمره ما شاف الزبدة فى حياته ولا يعرف بتستخدم فى أيه أساسا ..
عاملين معاه لقاء فى القناة الثالثة بيسألوه عن رأيه في مقاطعه المنتجات الدنماركية ..
قلهم " أه طبعا انا مع المقاطعه دا واجب وطنى يا جماعه أنتوا بتتكلموا إزاى .. "



* واحد واقف مع خطيبته/صحبته قدام قفص الأسود فى جنينه الحيوانات
بيقولها : " بصى .. أهو ده بقى أسد .. !!! " شاعرا بأنه قد منحها العلم والمعرفه المطلقة وأسرار الكون ..





* بنات بكرش لابسه بديهات ستومك.. عشان دى الموضه ..





* أسره مكونه من 4 أفراد أب وأم وبنت شابه وولد فى أعدادى قاعدين فى Café .. طلبوا عصاير وشيشتين .. مين اللى شرب الشيش ؟! .. البنت وأمها .. حاجه تغيظ... !!


* من شهر كده كده كان فى ماتش للأهلى و فريق تانى .. كان فيه 2 منقبات بيشجعوا فى المدرجات !! .. و واحده منهم كانت لابسه نقاب أحمر .. تشجيع بقى .. صباح التهييس



......

هههههههههههههههههههههه
دلوقتي بس انا عرف انا لية كل ما بتخنق من حاجة
بخرج الشارع
تسسسسسسسسسلم يا مان

شكرا ليكوا وان شاء الله اول ماخلص امتحناتي هجيب حجات تفتح النفس زي دي

و علي فكره الدماغ دي مش دماغي دي دماغ واحد تاني
عشان حقوق الملكيه الفكريه
المنيثقه من اللاوعي الداخل من اللاشعور

ميرسي ليك على التوبيك الرائع
تقبل مرورى