يوم من ايام عبد الفتاح وعنايات

من طرف **Lovely Emy** السبت أغسطس 02, 2008 2:32 pm

يوم من أيام عبد الفتاح وعنايات
ندخل نشوف

من أول ما نفتح الباب

نسمع صوت

الراديو مفتوح على اعلى درجه

وام كلثوم بتقول يا صباح الخير يلى معانا

والحنفيه فى المطبخ مفتوحه على الآخر

البراد عمال يصفروالميه فيه غليت وفارت

والبنت الصغيره عماله تصرخ وتعيط

والولد الوسطنى بيشد فى الشراب من اخوه الكبيير

والأب واقف يحلق دقنه

عمال يفكر فى اليوم الجديد والقرف الى منتظره

معندهوش اى لمحة تفاؤل

كتلة تشاؤم وعكننه

والأم واقفه فى بلكونة المطبخ تنده على بتاع الفول

نصها بره وربنا هو الستار
الأب موظف

والأم مدرسه

والعيال

ولدين وبنت

الأب :انت يا ست هانم فين الشبشب والفوطه

الولد الصغير:يابابا ااقولك هما فين

الاب: فين يا أخى

الولد :طيب يا بابا فكر شويه ثغيرين

الاب :امشى يا واد انت انجر من هنا ..يا عنايات ياعنايات

عنايات:فى ايه ياراجل على الصبح

الاب :صبح انتم خليتوه ليل ..عاوز الشبشب والفوطه

عنايات:هو انت دخلت الحمام حافى

عبد الفتاح: هو انا لقيت الشبشب وقلت لاء عاوز اتوضى

عنايات :مش سامعنى وانا عماله انده على المخفى بتاع الفول

الاب :فول ايه هو انت كل يوم تطفحينا فول

عنايات :يا فتاح يا عليم

هو انت عاوز تاكل بسطرمه وبيض ولانشون

وجبنه رومى بالمصروف المقشف

الى انت بتديه لى أول كل شهر

عبد الفتاح:مصروف مقشف !!! انت الى ست ايديك سايبه

عنايات :ايدى سايبه ..ياراجل اتقى الله دا لولا ماما.....

عبد الفتاح: يا دى الصباح الى بدأ بماما

مش عاوز اطفح وبلاش سيرة امك على الصبح

عنايات: اسمها امك برضه ياراجل يا متعلم

عبد الفتاح :هو انا شتمتك دانا بقول امك باللغه العربيه والله حاجه غريبه.. طيب عاوز الشبشب والفوطه

عنايات :والله أمال ايه الى فى رجلك وعلى إيدك

عبد الفتاح يفتح عينيه على الآخر هم جم أمتى

الواد الصغير :انا ياأبتى

الاب:أبتى!!! فى ايه يا واد

الواد الصغير مش انت بتتكلم باللغه العربيه وقولت على ستو امك

الاب:نهارك إسود يا وله ..هو انت بتتصنت على كلامنا

عبد الفتاح في سره يادى نهارك يا عبد الفتاح

خلاص ضعت يا تيحه الواد الفتان ده هيقول لامها

عنايات :بتقول ايه ياعبد الفتاح

عبد الفتاح: مش بقول ..خلى نهاركم يعدى على خير امشى يا واد انت انجر من هنا

الولد الصغير:سمعا" وطاعه يا والدى

عنايات :تضحك وتمشى تجر فى رجلها
اصلها من المقاس الإكس لارج

عبد الفتاح يلبس هدومه ويبدأ تانى فى الصراخ: يا عنايات انت يا هانم يا دى الصبح الى مش هيعدى

عنايات :انت يارجل خلينى اروح احضر الفطار

عبد الفتاح:انا قلت مش هاطفح

عنايات :مش ليك الطفح ده للعيال

عبد الفتاح :طيب الله يكرمك عاوز شراب مفيهوش قطع

عنايات: وانا أجيب منين مانت مش بتشترى وآخر الشربات كان جايبهولك بابا من العمرة السنه الى فاتت

عبدالفتاح :قطيعه تقطع الشربات على الفانلات هو انا إيه عايش عواله على أهلك

الواد زيزو يجى جرى

و استنو بقية اليوم اللي مش فايت